बीड : बीड जिल्ह्याचे विभाजन करून स्वतंत्र अंबाजोगाई जिल्ह्याची निर्मिती करावी, या मागणीसाठी बुधवारी अंबाजोगाईत आंदोलन करण्यात आले. विविध पक्ष, संघटनांसह शहरातील नागरिकांनी या आंदोलनात उत्स्फूर्त सहभाग घेतला. शहरातील यशवंतराव चव्हाण चौकात जिल्हा निर्मिती कृती समितीच्या वतीने रस्ता रोको करण्यात आले. मराठवाडा मुक्तिदिनापर्यंत जिल्हा निर्मिती न केल्यास आंदोलन अधिक तीव्र करण्याचा इशारा या वेळी देण्यात आला.
नवीन जिल्हा निर्मिती करण्यासंदर्भात नेमण्यात आलेल्या समितीने अंबाजोगाई जिल्हा निर्मिती संदर्भात अहवाल सरकारला दिला आहे. माजी मंत्री विमलताई मुंदडा यांनी जिल्हा निर्मितीसाठी आवश्यक अतिरिक्त जिल्हाधिकारी, अतिरिक्त पोलिस अधीक्षक, उपप्रादेशिक परिवहन अधिकारी अशी सर्व सरकारी कार्यालय अंबाजोगाई येथे आणली आहेत. आमदार नमिता मुंडदा यांनीही विधानसभेत या प्रश्नाबाबत आवाज उठवला होता. मात्र, तरीही सरकारच्या लाल फितीच्या कारभारमुळे अंबाजोगाई जिल्हा निर्मितीच्या प्रश्नाचे भिजत घोंगडे अद्यापही कायम आहे. त्यामुळे जिल्हा निर्मिती कृती समिती आक्रमक झाली आहे.
आज यशवंतराव चव्हाण चौक येथे अंबाजोगाई जिल्हा निर्मिती कृती समितीच्या वतीने अंबाजोगाई जिल्हा जाहीर करावा या मागणीसाठी रास्ता रोको आंदोलन करण्यात आले होते. या आंदोलनात सहभागी झालो. अंबाजोगाई जिल्हा जाहीर होत नाही, तोपर्यंत आपल्याला लढा सुरू ठेवायचा आहे व शासन स्तरावर जिल्हा निर्मितीसाठी प्रयत्न करू. – राजकिशोर मोदी, माजी नगराध्यक्ष, अंबाजोगाई
Discussion about this post